Një ngjarje e rëndë ka tronditur Maliqin këtë të dielë, ku një banesë u përfshi nga tymi pas një zjarri të papritur, duke marrë jetën e një nëne dhe të djalit të saj adoleshent. Viktimat janë 40-vjeçarja Merjeme Azizllari dhe djali i saj 14-vjeçar, Luka Azizllari, ndërsa vajza 6-vjeçare ndodhet në gjendje të rëndë në spital.

Fqinja e familjes, Benereta Pashollari, rrëfen për mediat momentet tragjike dhe rrethanat e ngjarjes. Sipas saj, zjarri ka nisur nga një sfungjer i dyshekut, duke përhapur tym të dendur në të gjithë shtëpinë. Për shkak të mungesës së oksigjenit, nëna dhe djali nuk arritën të dilnin në kohë dhe humbën jetën si pasojë e asfiksisë.

Pashollari tregon se familja përballej me vështirësi ekonomike dhe se fëmijët kishin nevoja të veçanta shëndetësore:

“Familje punëtorë, ishin me ekonomi të dobët. Babai i fëmijëve punonte, ajo mbante dy fëmijët, i ushqente me aq sa kishte mundësi. Bashkia i ndihmonte çdo muaj plus që merrnin dhe ushqime dhe ndihmë ekonomike. Vajza ishte më e vogël se djali, djali në këmbë, vajza nuk lëvizte dhe aq. Nëna nuk kujdesej shumë për fëmijët. Ne të lagjes i flisnim, i thoshim ‘laji, shpëlaji’. E ndihmonim, çdo gjë i çonim.”

Momente dramatike të shpëtimit i përshkruan vetë fqinja:

“Vajza është hedhur nga dritarja, kurse ata të dy nuk mundën të dilnin. Vajzën e shpëtoi një zonjë, kurse djali mbaroi me të ëmën. Doli kjo zonja rastësisht pasi e thirra në telefon për të marrë diçka. Në atë kohë dëgjoi thirrjet dhe vajza i binte derës me shkelma. Dëgjoi fqinja, doli dhe fqinja tjetër dhe pastaj arritën atje ku kanë arritur.”

Autoritetet vazhdojnë hetimet për shkaqet e zjarrit, ndërsa komuniteti lokal mbetet i tronditur nga kjo ngjarje tragjike që ka lënë një familje në hije dhe një fëmijë të plagosur rëndë.