Një tragjedi e rëndë ka tronditur qytetin e Maliqit, ku një banesë u përfshi nga zjarri, duke marrë jetën e një nëne dhe djalit të saj adoleshent nga familja Azisllari. Viktimat janë Merjeme Azizllari, 40 vjeç, dhe djali i saj Luka, 14 vjeç, të cilët humbën jetën si pasojë e asfiksisë. Vajza e mitur, 6-vjeçare, ndodhet në gjendje të rëndë në spitalin e Korçës.

Sipas informacioneve paraprake, shkak i zjarrit dyshohet të ketë qenë soba me dru brenda banesës.

Një nga komshinjtë e familjes, Sefer Shkëmbi, tregon për gjendjen e vështirë ekonomike të familjes dhe sfidat me të cilat përballeshin:

“Unë jam komshi këtu, fëmijët ishin me autizëm, ndërsa mamaja ishte mirë. Nuk punonte, ishte shtëpiake. Vetëm burri punonte. Ishin në kushte të vështira ekonomike. Janë dy vëllezër që jetojnë ngjitur, këta sikur ishin më ndryshe nga ekonomia. Nuk e di si ndodhi ngjarja, unë madje sa e dëgjova, nuk e dija që ishte në lagjen time sa e mora vesh dola.”

Autoritetet po vijojnë hetimet për të përcaktuar shkaqet e sakta të zjarrit, ndërsa komuniteti lokal mbetet i tronditur nga humbja tragjike e dy jetëve dhe gjendja kritike e vajzës së mitur.