Kryeministri izraelit, Benjamin Netanyahu, ka udhëzuar forcat e sigurisë të ndërmarrin “veprim të fuqishëm” ndaj caqeve të militantëve në Gazë, duke akuzuar Hamasin për shkelje të armëpushimit. Zyra e Netanyahut deklaroi:

“Pas shkeljes së armëpushimit nga Hamasi, kryeministri Netanyahu ka mbajtur konsultime me ministrin e Mbrojtjes dhe zyrtarë të lartë të sigurisë dhe i ka udhëzuar që të ndërmarrin veprim të fuqishëm kundër caqeve terroriste në Rripin e Gazës.”

Megjithatë, krahushtarak i Hamasit mohoi çdo shkelje dhe tha se grupi po i përmbahet marrëveshjes së armëpushimit, duke u shprehur se nuk ka njohuri për ndonjë konflikt në Rafah, ku ushtria izraelite ka kryer sulme ajrore.

Mediat izraelite raportuan se forcat ajrore kanë kryer sulme në Rafah, në jug të Gazës, ndërsa ushtria izraelite tha se disa “terroristë” hapën zjarr ndaj trupave të saj në Rafah dhe më pas sulmoi një grup tjetër në Han Junis.

Izraeli dhe Hamasi akuzojnë njëri-tjetrin për shkelje të armëpushimit, ndërsa pikëkalimi në Rafah mbetet i mbyllur deri në njoftim të mëtejshëm. Një tjetër çështje e tensionuar është kthimi i trupave të pengjeve të vdekur: Hamasi ka dorëzuar mbetjet mortore të 12 pengjeve, ndërsa ka liruar të gjitha 20 pengjet e gjalla, por Izraeli kërkon dorëzimin e trupave të 28 pengjeve.

Sulmet vijnë pas paralajmërimeve të SHBA-së për raporte të besueshme që Hamasi po planifikon një sulm ndaj civilëve palestinez, gjë që do të përbënte shkelje të armëpushimit, megjithëse Hamasi e mohon këtë pretendim.

Situata mbetet e tensionuar, ndërsa komuniteti ndërkombëtar kërkon ruajtjen e armëpushimit dhe shmangien e përshkallëzimit të konflikteve.