Kandidati i opozitës për Bashkinë e Tiranës, Florjan Binaj, iu përgjigj sulmeve të kryeministrit Edi Rama gjatë podkastit të tij të fundit, ku Rama e cilësoi Binajn “aktor humori gjoja i pavarur”.

Përmes një postimi në Facebook, Binaj u shpreh se kryeministri është “aktori më i madh në Shqipëri”, duke shtuar se qytetarët po paguajnë 140 milionë euro për projektet e tij, pa përfitime konkrete:

“Aktori më i madh në Shqipëri është Edi Rama, që u merr 140 milionë Euro qytetarëve duke ‘i bindur’ se po bën incenerator pa vënë asnjë tullë! Prestigjiator”, shkroi Binaj.

Nga ana tjetër, gjatë podkastit, Rama ironizoi përzgjedhjen e opozitës për kryebashkiakun e kryeqytetit, duke e quajtur Binajn aktor që “për vite të tëra i ka bërë për të qeshur të gjithë”, madje edhe Kongresin e PS-së.

Rama theksoi se qytetarët që do të votojnë Partinë Socialiste do të zgjedhin “drejtuesen e duhur dhe qeverisë partneren e duhur për kryeqytetin”, duke e paraqitur kandidaturën e Binajt si një përpjekje për të qeshur dhe jo për të qeverisur.

Kjo shkëmbim akuzash risjell në vëmendje tensionin politik mes mazhorancës dhe opozitës, teksa zgjedhjet lokale të Tiranës po afrojnë dhe fushata intensifikohet.