Deputeti i Lëvizjes Vetëvendosje dhe ministër në detyrë i Financave, Hekuran Murati, ka kritikuar ashpër partitë opozitare, duke i akuzuar se kanë vendosur “inatin mbi interesin shtetëror” duke bllokuar formimin e Kuvendit dhe të Qeverisë.

Murati theksoi se Lëvizja Vetëvendosje ka përmbushur të gjitha detyrat kushtetuese që prej certifikimit të rezultateve të zgjedhjeve, ndërsa opozita ka zgjedhur të vonojë dhe të zvarrisë proceset për të penguar krijimin e institucioneve.

“Të gjitha zvarritjet, të gjitha vonesat, siç është parë edhe sot kanë qenë në mënyrë që të bllokohet qoftë formimi i Kuvendit, qoftë formimi i Qeverisë nga fituesi i zgjedhjeve. Kur atyre u ofrohet e njëjta, ato refuzojnë,” tha Murati.

I pyetur për emrin e Dimal Bashës si kandidat për ministër, Murati u shpreh se propozimi për postin e ministrit të Infrastrukturës ishte vendosur më herët, por është imponuar nga situata e bllokimit nga opozita.

“Kam qenë edhe unë i propozuar për postin e kryetarit të Kuvendit, po ashtu edhe Nagavci e Gërvalla, si alternativa kur opozita bllokonte konstituimin e Kuvendit,” shtoi ai.

Deklaratat e Muratit risjellin tensionin politik mes mazhorancës dhe opozitës, teksa procesi i krijimit të institucioneve mbetet i ngadaltë.