Një operacion i Rojës Bregdetare Greke pranë ishullit “Prasoudi” të Igumenicës përfundoi me sukses, duke shpëtuar jetën e një 50-vjeçari shqiptar, i cili rrezikonte të mbytej pasi skafi i tij po fundoshej.

Por pas shpëtimit, autoritetet bënë një zbulim të papritur: brenda mjetit gjysmë të fundosur u gjetën 135.88 kilogramë kanabis të papërpunuar. Me ndihmën e një zhytësi privat, nga skafi u nxorën pesë pako plastike që përmbanin 79.75 kg, ndërsa në zonën detare të “Votës” në Sagiada u gjetën gjashtë pako shtesë, me peshë 56.13 kg. Vlera e drogës së sekuestruar arrin rreth 400 mijë euro.

50-vjeçari shqiptar u arrestua nga Autoriteti Qendror Portual i Igumenicës, i cili po kryen hetimet paraprake. Ai akuzohet për trafik droge dhe hyrje të paligjshme në territorin grek, pasi nuk dispononte dokumente të vlefshme udhëtimi.

Përveç drogës, u sekuestruan edhe skafi prej poliesteri, që shërbente si mjet transporti, dhe një telefon celular, që do t’i nënshtrohet ekspertizës. Hetimet vijojnë për të përcaktuar origjinën, destinacionin e drogës dhe mundësinë e përfshirjes së personave të tjerë në këtë trafik.