Seanca plenare e kësaj të hëne në Kuvend, ku kreu i SPAK-ut Altin Dumani raportoi për veprimtarinë e institucionit gjatë vitit 2024, u shoqërua me debate të ashpra politike.
Kryetari i Partisë Demokratike, Sali Berisha, akuzoi ashpër Dumanin, duke e cilësuar “avokatin e vjedhjeve më të mëdha në historinë e Shqipërisë”.
Gjatë fjalës së tij nga foltorja e Kuvendit, Berisha deklaroi se Dumani po mbron aferat korruptive të qeverisë, përfshirë çështjen e inceneratorëve dhe marrëveshjen e qeverisë me kompaninë CEZ, të cilat, sipas tij, i kanë shkaktuar buxhetit të shtetit rreth 1 miliard euro humbje.
“Ju, avoketërit e Dumanit, të kapurit peng të Edi Ramës, harroni se qytetarët shqiptarë kanë humbur 630 milionë euro vetëm nga pazari me CEZ-in. Këto i mbulon Dumani dhe ‘dumanërit’. Qytetari shqiptar pagoi 400 milionë euro për inceneratorët që nuk kanë as nam, as nishan, dhe ai thotë se hetimi është ende paraprak,” — u shpreh Berisha.
Sipas kreut të opozitës, SPAK nuk ka vepruar me të njëjtin standard ndaj të gjithë zyrtarëve të përfshirë në dosjet korruptive. Ai përmendi rastin e ish-zv.kryeministrit Arben Ahmetaj, i cili, sipas Berishës, u dënua “vetëm për disa pllaka banjoje”, ndërsa personat e vërtetë përgjegjës për aferën e djegësve “vazhdojnë të mbeten të paprekur”.
“Nuk i ka vjedhur Altin Dumani këto para, por ai është bërë avokat i vjedhjeve më të mëdha në historinë e këtij vendi. Janë 1 miliard euro që mund të kishin dyfishuar rrogat e qytetarëve shqiptarë,” — tha Berisha.
Raportimi i Dumanit në Kuvend u zhvillua në kuadër të seancës maratonë kushtuar institucioneve të drejtësisë, ku dhanë llogari edhe Prokurori i Përgjithshëm, Inspektori i Lartë i Drejtësisë dhe drejtuesit e KLGJ-së e KLP-së.
