Ish-zëvendëskryeministri Arben Ahmetaj ka reaguar ashpër ndaj kreut të SPAK, Altin Dumani, duke e akuzuar për qëndrim selektiv në hetimet për aferën e inceneratorëve.
Në një lidhje të drejtpërdrejtë në emisionin “Çim Peka Live”, Ahmetaj deklaroi se nuk ka asnjë firmë apo përgjegjësi ligjore në dosjen e inceneratorëve dhe kërkoi që Dumani të japë vetë llogari për veprimet e tij si drejtues i institucionit.
“Unë s’kam asnjë firmë te inceneratorët. Pse nuk merret ky me McGonigal? Thonë ‘jemi duke hetuar’… Pse, shqiptarët janë budallenj? Unë i sugjeroj Dumanit që të bëhet vetë bashkëpunëtor i drejtësisë, kur të akuzohet për shpërdorim detyre,” — u shpreh Ahmetaj.
Ish-zëvendëskryeministri akuzoi SPAK-un për mungesë transparence dhe për shmangie të hetimeve ndaj ish-agjentit të FBI-së Charles McGonigal, një çështje që, sipas tij, lidhet drejtpërdrejt me qeverinë aktuale.
Deklaratat e Ahmetajt vijnë pas raportimit të Dumanit në Kuvend për veprimtarinë e SPAK gjatë vitit 2024, ku ai theksoi se hetimet për aferën e inceneratorëve janë ende në fazë paraprake.
