Tiranë, 27 tetor 2025 — Kreu i Prokurorisë së Posaçme kundër Korrupsionit dhe Krimit të Organizuar (SPAK), Altin Dumani, u pyet sot në Kuvend nga deputeti i Partisë Demokratike, Flamur Noka, për mungesën e hetimeve ndaj fenomenit të patronazhistëve në zgjedhjet e kaluara.
Dumani shpjegoi se termi “patronazhimi” nuk ekziston në Kodin Penal, por theksoi se çdo veprim që përfshin premtime për favore në këmbim të votës përbën vepër penale.
“Kur patronazhisti premton legalizim shtëpie, para apo regjistrim të pronës në hipotekë, këtu nuk kemi patronazhim, por korrupsion aktiv apo pasiv në zgjedhje. Në Kod Penal nuk ka vepër që quhet ‘patronazhimi’. Penalizojeni si Kuvend dhe ne ushtrojmë ndjekjen penale,” deklaroi Dumani.
Ky reagim vjen pas debateve të shumta politike mbi praktikën e patronazhistëve dhe ndikimin e tyre në proceset zgjedhore në vend.
