Këngëtari kanadez dhe fituesi i çmimit “Grammy”, Justin Bieber, ka shkaktuar reagime të forta në rrjetet sociale pas një deklarate të bërë gjatë një transmetimi të drejtpërdrejtë në platformën Twitch, ku foli hapur për mënyrën se si e percepton tradhtinë në martesë.

Gjatë diskutimit, Bieber u shpreh se për të, edhe një mendim i dëshirueshëm për një person tjetër mund të konsiderohet si formë tradhtie, duke e krahasuar me një veprim real jashtëmartesë.

“Nëse mendon me dëshirë për dikë tjetër, është njësoj si të veprosh me të,” – tha këngëtari, duke shtuar:
“Ashtu si të ndihesh me zemërim ndaj dikujt është si të kryesh një akt dhune ndaj tij, edhe dëshira për dikë tjetër është tradhti ndaj partnerit tënd.”

Deklaratat e artistit ndezën menjëherë debat në internet. Ndjekësit u ndanë në dy kampe: një pjesë e vlerësoi sinqeritetin e tij si shprehje respekti ndaj bashkëshortes Hailey Bieber, ndërsa të tjerë e quajtën qëndrimin “të tepruar dhe jorealist”, duke argumentuar se mendimet njerëzore janë të pakontrollueshme dhe nuk përbëjnë tradhti për sa kohë nuk kthehen në veprime.

Komentet e Bieber vijnë në një moment të ndjeshëm për çiftin, i cili prej më shumë se një viti është në qendër të thashethemeve për probleme martesore. Megjithatë, Justin dhe Hailey janë shfaqur shpesh bashkë në publik, duke mohuar zërat për ndarje.

Burime pranë çiftit thanë për mediat rozë se pavarësisht periudhave të vështira, ata mbeten të bashkuar dhe po fokusohen te jeta familjare pas lindjes së djalit të tyre, Jack Blue.