Një ngjarje e rëndë ka tronditur Karolinën e Veriut, ku Wellington Delano Dickens, 38 vjeç, është arrestuar pasi ka rrëfyer në polici vrasjen e katër fëmijëve të tij.

Sipas autoriteteve amerikane, Dickens telefonoi vetë policinë për të pranuar krimin, ndërsa oficerët e gjetën të qetë në banesën e tij. Në bagazhin e një makine në garazh, u zbuluan trupat e katër fëmijëve të mitur:
• Leah Dickens, 6 vjeç
• Zoey Dickens, 9 vjeç
• Wellington Dickens, 9 vjeç
• Sean Brassfield, 10 vjeç

Hetimet paraprake tregojnë se trupat kishin qenë në automjet për disa muaj, ndërsa dokumentet gjyqësore sugjerojnë se fëmijët mund të jenë vrarë që më 1 maj.

Një tjetër fëmijë, djali 3-vjeçar i Dickens, u gjet gjallë dhe i padëmtuar brenda shtëpisë. Autori po përballet me akuza për vrasje të shkallës së parë.

Mediat lokale raportojnë se bashkëshortja e tij, Ray Jones Dickens, kishte ndërruar jetë në prill të vitit 2024, çka mund të ketë ndikuar në gjendjen e tij psikologjike.

Xhaxhai i 38-vjeçarit, në një deklaratë për mediat, tha se Dickens ishte veteran i Luftës në Irak dhe se “nuk ishte më i njëjti njeri që pas kthimit nga ushtria”.

“Si të gjithë, u shokova. Kurrë nuk do ta mendoja se diçka e tillë mund të ndodhte në familjen tonë,” – shtoi ai.

Autoritetet po hetojnë motivet e ngjarjes, ndërsa Dickens do të paraqitet sërish në gjykatë javën e ardhshme.