Gjatë seancës në Kuvend mbi kërkesën e Partisë Demokratike për ngritjen e Komisionit Hetimor për verifikimin e veprimeve të zyrtarëve shqiptarë lidhur me ish-agjentin e FBI-së, Charles McGonigal, ministri Çuçi u shpreh se propozimi i opozitës nuk përmbush kriteret ligjore.

“Objekti i paraqitur nuk ka asnjë alternativë të propozuar hetimi dhe nuk identifikon fusha të tjera brenda të njëjtës tematikë. Ndërtimi formal i objektit nuk mjafton për të justifikuar thirrjen e një komisioni hetimor,” tha Çuçi.

Ai theksoi se ngritja e komisioneve hetimore kërkon të dhëna konkrete apo indicie të mjaftueshme për shkeljen e ligjit nga organet shtetërore, subjektet publike ose zyrtarët shtetëror, dhe se në këtë rast nuk provohet ekzistenca e ndonjë vendimmarrjeje apo akti të manipuluar në funksion të marrëdhënieve me McGonigal.

Çuçi shtoi se Kuvendi nuk ka kompetencë për të hetuar çështje që kanë ndodhur jashtë territorit të Shqipërisë: “Kushtetuta e përcakton qartë se komisionet hetimore janë instrumente kontrolli mbi institucionet shqiptare. Kjo çështje ka ndodhur dhe është gjykuar në SHBA.”

Nga ana tjetër, kryetari i PD-së, Sali Berisha, akuzoi mazhorancën për bllokim të hetimeve: “Ne e kërkojmë këtë komision sepse në dosjen e gjykatës citohet emri i Edi Ramës 13 herë. Ju po shkelni Kushtetutën dhe bllokoni çdo hetim që kërkohet për Edi Ramën.”

Berisha theksoi rëndësinë e hetimit parlamentar për skandalin ndërkombëtar që përfshin McGonigal dhe zyrtarë shqiptarë, duke e cilësuar një çështje ende të pazbardhur dhe me dimensione të gjera për institucionet e vendit.

Kërkesa e PD-së u hodh poshtë nga mazhoranca, duke i dhënë fund diskutimit për këtë çështje në Kuvend.