Seanca plenare e sotme u shoqërua me tension pasi Partia Socialiste vendosi të mos ngrinte dy komisionet hetimore të kërkuara nga opozita, për çështjen “McGonigal” dhe zgjedhjet e 11 majit.

Si pasojë, deputetët e Partisë Demokratike, nën drejtimin e Sali Berishës, braktisën sallën e Kuvendit.

Berisha akuzoi qeverinë për pengimin e hetimit të skandalit të ish-shefit të kundërzbulimit të FBI-së, Charles McGonigal, duke theksuar se në dosjen për Shqipërinë përmendet 13 herë emri i kryeministrit Edi Rama, përfshirë edhe pagesa prej 220 mijë dollarësh që sipas opozitës lidhen me veprimtari korruptive.

Kreu i PD-së kritikoi gjithashtu qeverinë për “zhvlerësimin” e zgjedhjeve të 11 majit përmes shkeljeve të ligjit dhe standardeve ndërkombëtare.

“Pseudo-mazhoranca në mënyrën më antikushtetuese i mohoi opozitës të drejtën më themelore, kushtetuese, për ngritjen e Komisionit Hetimor parlamentar. Kjo e drejtë e pakicës është patjetërsueshme dhe nuk mund të preket,” tha Berisha, duke i cilësuar vendimet e mazhorancës si shkelje të të drejtave kushtetuese dhe pengesë për transparencën parlamentare.