Ashtu siç ishte paralajmëruar në rrjetet sociale, me qindra qytetarë të Vlorës kanë zbritur sot në rrugë për të nderuar kujtimin e Leandro Shametajt, 17-vjeçarit që humbi jetën tragjikisht tre ditë më parë në një aksident rrugor.

Nxënës të gjimnazit “Ali Demi”, ku mësonte i riu, bashkë me qytetarë të shumtë dhe përfaqësues të institucioneve, kanë marshuar në heshtje nga Xhamia e Plumbit në qendër të Vlorës deri pranë vendit ku ndodhi ngjarja.
Marshimit i është bashkuar edhe prefektja e qarkut, Evis Allushi, ndërsa pjesëmarrësit mbanin pankarta me mesazhe për më shumë kujdes, ndërgjegjësim dhe siguri rrugore.

Kjo ngjarje e rëndë ka prekur thellë opinionin publik. Aksidenti ndodhi rreth orës 00:15, kur një automjet tip Porsche, që drejtohej nga një 32-vjeçar në gjendje të dehur, përplasi motorin me të cilin po lëvizte Leandro në bulevardin “Ismail Qemali”. Adoleshenti po kthehej në shtëpi pas turnit të punës si kamarier.

Shoferi, H. B., është arrestuar dhe po hetohet për “drejtim të automjetit në mënyrë të parregullt” dhe “shkelje të rregullave të qarkullimit rrugor”.

Familjarët e të ndjerit kanë kërkuar dënim të rreptë për autorin dhe masa urgjente për rritjen e sigurisë rrugore, veçanërisht në zonat urbane ku lëvizja është e dendur.

Marshimi simbolik në Vlorë ishte një thirrje për reflektim të përbashkët ndaj përgjegjësisë në rrugë dhe respektit për jetën — në kujtim të një të riu që humbi rrugëtimin drejt së ardhmes.