Policia e Tiranës ka finalizuar me sukses operacionin e koduar “Muzeu i errët”, pas një hetimi disa javor të zhvilluar me metoda speciale, në bashkëpunim me Prokurorinë e Tiranës. Si rezultat, u arrestuan A. H., 20 vjeç, dhe I. Gj., 30 vjeç, ndërsa J. H., 42 vjeç, u shpall në kërkim. Të tre janë banues në Kamzë.
Sipas hetimeve, grupi dyshohet se ishte përfshirë në trafikimin e objekteve me vlera historike dhe kulturore, të vjedhura në disa shtete europiane dhe të sjella në Shqipëri për t’u shitur në mënyrë të paligjshme.
Gjatë kontrollit në banesën e A. H. dhe J. H. (babë e bir), policia zbuloi një sasi të konsiderueshme objektesh artistike dhe antike, mes tyre:
• 31 punime druri të gdhendura me motive të ndryshme;
• 3 skulptura në formë dhëmbi elefanti;
• 6 piktura të autorëve të huaj;
• 411 albume me pulla poste nga vende të ndryshme të botës;
• një procesverbal origjinal francez i vitit 1925;
• dhe objekte të tjera me vlera të larta kulturore, si një shpatë metalike, një skulpturë shqiponje, një vazo qelqi, dhe një valixhe druri me punime dekorative.
Hetimet vijojnë për të kapur personin në kërkim dhe identifikuar bashkëpunëtorë të tjerë të mundshëm në këtë aktivitet kriminal.
Materialet procedurale i janë referuar Prokurorisë së Tiranës, e cila do të vijojë hetimet për zbardhjen e plotë të rastit.
