Pas disa javësh mungesë për shkak të një dëmtimi muskulor, Neymar është rikthyer fundjavën e kaluar në fushë me fanellën e Santos, por kthimi i tij në Kombëtaren braziliane do të duhet të presë edhe pak.

Trajneri i Brazilit, Carlo Ancelotti, publikoi listën e lojtarëve të grumbulluar për dy miqësoret e nëntorit, ku “Seleção” do të përballet me Senegalin më 15 nëntor në Angli dhe Tunizinë më 18 nëntor në Francë.

Në listën e publikuar mungon emri i Neymarit, një vendim që Ancelotti e arsyetoi me gjendjen fizike ende jo optimale të sulmuesit.

“Nuk kam folur sërish me Neymarin. Do të shohim kur të jetë gati për t’u rikthyer. Dua që ai të jetë 100% para se të bashkohet me ekipin,” – u shpreh trajneri italian.

Ylli 32-vjeçar kishte pësuar një dëmtim në kofshën e djathtë në mes të shtatorit, që e mbajti jashtë për shtatë ndeshje radhazi. Ai u rikthye fundjavën e kaluar në ndeshjen ndaj Fortalezës, duke luajtur vetëm 23 minuta, por stafi teknik i Brazilit preferon të mos e rrezikojë rikthimin e tij të parakohshëm.

Në mungesë të Neymarit, Ancelotti ka zgjedhur të mbështetet tek brezi i ri i yjeve brazilianë, me emra si Vinicius Jr., Rodrygo, Richarlison, Matheus Cunha dhe João Pedro.
Në listë janë përfshirë gjithashtu Estêvão (Chelsea), Luiz Henrique (Zenit) dhe Vitor Roque, që po shkëlqen me Palmeirasin.

Trajneri italian shtoi se lista për Botërorin 2026 është tashmë thuajse e përfunduar:

“Kemi 17 ose 18 lojtarë të sigurt në formacion. Në mars do të kemi një tjetër test të rëndësishëm dhe ajo listë do t’i ngjajë shumë asaj përfundimtare.”

⸻

Lista e Brazilit për miqësoret e nëntorit

Portierë: Bento, Ederson, Hugo Souza
Mbrojtës: Alex Sandro, Caio Henrique, Danilo, Éder Militão, Fabricio Bruno, Gabriel Magalhães, Luciano Juba, Marquinhos, Paulo Henrique, Wesley
Mesfushorë: Andrey Santos, Bruno Guimarães, Casemiro, Fabinho, Lucas Paquetá
Sulmues: Estêvão, João Pedro, Luiz Henrique, Matheus Cunha, Richarlison, Rodrygo, Vinicius Jr., Vitor Roque