Një incident i rëndë është regjistruar më 1 nëntor në zonën e njohur si “pika zero”, pranë Leposaviqit, ku sipas autoriteteve të Kosovës, xhandarmëria serbe ka hyrë brenda territorit të Kosovës, ka plagosur dhe rrëmbyer një qytetar kosovar me inicialet M.V., i nacionalitetit serb.
Ngjarja, e cila ka shkaktuar tensione të reja mes Prishtinës dhe Beogradit, është konfirmuar nga Policia e Kosovës, e cila ka njoftuar se menjëherë pas marrjes së informacionit ka njoftuar KFOR-in dhe ka nisur hetimet në bashkëpunim me Prokurorinë Themelore të Mitrovicës – Departamentin për Krime të Rënda.
Sipas dëshmive të siguruara, persona të maskuar kanë kaluar kufirin, kanë hapur zjarr, duke plagosur dhe rrëmbyer viktimën, të cilën më pas e kanë dërguar në territorin e Serbisë. Dëshmitarët kanë treguar se pas rrëmbimit, M.V. është transportuar me autoambulancë drejt qytetit të Nishit.
Sveçla: “Një akt i përsëritur dhe i pandëshkuar”
Ministri në detyrë i Punëve të Brendshme, Xhelal Sveçla, ka reaguar ashpër, duke e quajtur këtë rast një shkelje flagrante të sovranitetit të Kosovës dhe vazhdim të politikave destabilizuese të regjimit të Vuçiqit.
“Ky është një akt i përsëritur dhe i pandëshkuar. Dy vite më parë, njësitë speciale serbe hynë në territorin tonë dhe rrëmbyen tre pjesëtarë të policisë sonë. Pas kësaj ndodhi sulmi terrorist në Banjskë. Serbia po ndjek të njëjtën politikë të frikësimit dhe dhunës ndaj qytetarëve që nuk i binden regjimit të Vuçiqit,” – shkroi Sveçla në Facebook.
Ai i ka bërë thirrje faktorit ndërkombëtar që të reagojë:
“Është koha e fundit që bota demokratike të veprojë me masa ndëshkuese ndaj Serbisë, në mënyrë që këto akte armiqësore të mos përsëriten më.”
Reagimi i presidentes Vjosa Osmani
Edhe presidentja e Kosovës, Vjosa Osmani, ka dënuar ashpër incidentin, duke e quajtur atë një tjetër provë të qasjes hegjemoniste të Serbisë.
“Çdo qytetar që guxon të flasë kundër regjimit autokratik të Vuçiqit, sulmohet e torturohet. Kjo është dëshmi e qartë se Serbia nuk ka hequr dorë nga praktikat e saj destabilizuese ndaj Kosovës,” – deklaroi Osmani.
Ajo ka bërë thirrje që skena politike kosovare të flasë me një zë të vetëm, ndërsa bashkësia ndërkombëtare të reagojë me vendosmëri për të mbrojtur integritetin territorial të Kosovës.
Ngjarja ka rikthyer edhe një herë në qendër të debatit sigurinë në veri të vendit dhe rrezikun e përshkallëzimit të situatës në kufirin mes Kosovës dhe Serbisë.
