Gjykata Supreme e Shteteve të Bashkuara ka vendosur të lejojë administratën Trump të zbatojë politikën e saj që kufizon të drejtën e përcaktimit të gjinisë në pasaporta vetëm në opsionet “mashkull” dhe “femër”, duke rrëzuar praktikën e prezantuar nga administrata Biden që lejonte përdorimin e shenjës “X” si gjini e vetëzgjedhur.

Vendimi erdhi pas pranimit të një kërkese urgjente nga administrata Trump, e cila argumentoi se opsioni “X” bie jashtë parimeve të mbrojtjes së barazisë dhe se vetëm shënimi i gjinisë sipas lindjes pasqyron një fakt të thjeshtë të dokumentit të udhëtimit. Gjykata theksoi se “shfaqja e gjinisë së mbajtësve të pasaportave nuk shkel më shumë parimet e mbrojtjes së barabartë sesa shfaqja e vendit të tyre të lindjes – në të dyja rastet, Qeveria thjesht po dëshmon një fakt.”

Që nga viti 1992, Departamenti i Shtetit kishte lejuar, në rrethana të caktuara, që njerëzit të zgjedhin një shenjë mashkullore ose femërore që nuk përputhej me gjininë e lindjes. Në vitin 2021, administrata Biden prezantoi opsionin “X”, duke lehtësuar aksesin për aplikantët transgjinorë dhe duke hequr kërkesën për prova mjekësore të tranzicionit gjinor.

Pas vendimit të gjykatës, Prokurorja e Përgjithshme Pam Bondi reagoi duke deklaruar se vendimi pasqyron pikëpamjen e administratës se “ekzistojnë dy gjini” dhe se avokatët do të vazhdojnë të mbrojnë këtë perspektivë.

Vendimi i Gjykatës Supreme ka shkaktuar reagime të shumta në publik dhe pritet të ndikojë drejtpërdrejt në dokumentacionin e udhëtimit dhe të drejtave të personave transgjinorë në SHBA.