Ish-deputeti i Partisë Demokratike, Ervin Salianji, ka reaguar pas atentatit pranë Aeroportit të Rinasit, ku mbeti i vrarë Gilmando Dani dhe u plagos rëndë Muçi Shaljani (Sheqeri), agjenti i AMP-së që e shoqëronte.

Salianji e ka cilësuar ngjarjen si alarmante, duke theksuar se zonat që duhet të jenë të sigurta, si aeroporti, janë nën kontrollin e bandave kriminale. Sipas tij, krimi ka informacion të saktë mbi lëvizjet e kujtdo dhe mund të vendosë se kë të eliminojë.

“Vrasja e sotme në pikën më të rëndësishme të vendit, në aeroportin e Rinasit, aty ku duhet të ishte siguria maksimale, tregon paaftësinë dhe dorëzimin e qeverisë përballë krimit”, shkruan Salianji.

Ai shton se situata aktuale ka kthyer qytetarët në të pambrojtur: “Në Shqipërinë e Ramës nuk mund të ecësh me monopatina, por me makina të blinduara e me armë po. Frika dhe kërcënimi i bandave, që vendosin kush jeton e kush eliminohet, është vetëm njëra anë e medaljes kriminale. Ana tjetër është terrori që çdo person që kalon aty mund të goditet nga plumbat.”

Reagimi i ish-deputetit nxjerr në pah shqetësimin për sigurinë e qytetarëve dhe për mënyrën se si krimi i organizuar po vepron në zonat që duhet të jenë nën mbrojtje maksimale.