Policia ka dhënë detaje të reja lidhur me atentatin mafioz që ndodhi këtë të martë pranë Aeroportit të Rinasit, ku mbeti i vrarë Gilmando Dani, i njohur si miku i Emiljano Shullazit, dhe një tjetër person u plagos rëndë.

Automjeti që përdorën atentatorët, një makinë tip “Toyota”, u gjet i djegur në fshatin Halilaj të Fushë Krujës, vetëm pak kilometra larg vendit të ngjarjes.

Gjatë kontrollit të automjetit, policia ka sekuestruar katër armë zjarri, të cilat dyshohet se janë përdorur nga autorët gjatë sulmit. Armët tashmë do të dërgohen në Institutin e Policisë Shkencore për ekspertizë dhe analizë.

Ngjarja tregon planifikim dhe profesionalizëm të lartë të autorëve, ndërsa hetimet po vazhdojnë për identifikimin e të gjithë personave të përfshirë dhe zbardhjen e plotë të skemës së atentatit.