Presidenti amerikan Donald Trump ka nderuar këtë javë superyllin portugez të futbollit Cristiano Ronaldo me një “çelës të artë” të Shtëpisë së Bardhë – një dhuratë simbolike dhe tepër e rrallë, të cilën kreu i shtetit e ka dizenjuar personalisht.
Takimi u zhvillua gjatë vizitës së Ronaldos në Uashington si pjesë e një delegacioni saudit të udhëhequr nga Princi i Kurorës Mohammed bin Salman. Kjo shënoi edhe paraqitjen e tij të parë publike në SHBA që prej akuzave të vitit 2017, të cilat Ronaldo i ka mohuar me forcë.
Trump i priti me ceremoni të ngrohtë Ronaldon dhe partneren e tij Georgina Rodriguez, duke u ofruar një tur në Zyrën Ovale, si dhe dhuratën e çmuar – një simbol respekti që ai e ka ndarë vetëm me disa figura të zgjedhura ndër vite. Ndër marrësit e tjerë të këtij nderi personal të Trump janë Elon Musk, ish-kryeministri japonez Taro Aso dhe kryeministri izraelit Benjamin Netanyahu, të cilit ia dorëzoi i pari këtë çelës në vitin 2020.
Në fotot e publikuara, Ronaldo shihet duke mbajtur çelësin e artë dhe duke pozuar me Trump në Zyrën Ovale. Në një tjetër foto, ai shfaqet me një model të bombarduesit strategjik B-2 Spirit, të cilin Trump e ka përdorur në sulmet kundër objekteve bërthamore të Iranit në qershor. Një B-2 i vetëm kushton rreth 2 miliardë dollarë, ndërsa në operacion u angazhuan shtatë prej tyre, duke lëshuar bomba të fuqishme dhe mbi 30 raketa Tomahawk.
Trump e ka komentuar vizitën në platformën e tij Truth Social, duke shkruar:
“Ronaldo është një DJALLË I SHKËLQYER. Më pëlqeu shumë takimi ynë në Shtëpinë e Bardhë. Vërtet i zgjuar dhe i mirë!”
Postimi u shoqërua me një video të gjeneruar nga inteligjenca artificiale ku dyshja shfaqej duke luajtur futboll në Zyrën Ovale.
Dhurata e “çelësit të artë” është bërë gjithashtu edhe për Elon Musk të cilin Trump e ka vlerësuar për kontributet në teknologji dhe kriptovaluta, megjithëse marrëdhënia mes tyre ka kaluar ulje-ngritje. Interesant është fakti që Musk ishte i pranishëm edhe në darkën saudite të mbajtur të martën në Shtëpinë e Bardhë, ku pozoi me Ronaldon për një selfie, sinjal i një afrimi të ri mes tij dhe Trumpit.
