Mesfushori me prejardhje shqiptare, Granit Xhaka, po zhvillon një sezon mbresëlënës me Sunderlandin në rikthimin e klubit në Premier League. 33-vjeçari është shndërruar në lojtarin kyç të ekipit, duke udhëhequr “Macat e Zeza” si në fushë, ashtu edhe jashtë saj.
Sipas platformës prestigjioze të vlerësimeve “WhoScored”, Xhaka renditet aktualisht si mesfushori më i vlerësuar në gjithë kampionatin anglez, me notën 7.37. Kjo e vendos atë përpara emrave të mëdhenj si Declan Rice, Moisés Caicedo, Bruno Fernandes dhe Dominik Szoboszlai, duke e bërë një prej surprizave më të mëdha të sezonit.
Në këtë edicion, Xhaka ka regjistruar një gol dhe tre asistime, teksa organizimi i lojës dhe stabiliteti që i jep mesfushës së Sunderlandit vlerësohet gjerësisht. Kalimi i tij gjatë verës nga Bayer Leverkusen tek Sunderland për 15 milionë euro duket tashmë si një nga goditjet më të mira të merkatos.
Megjithatë, pas humbjes së fundit ndaj Fulhamit, kapiteni kuqezi i Zvicrës nuk e fshehu zhgënjimin. Në një postim në rrjetet sociale, ai shkroi:
“Humbjet gjithmonë dhembin – tani ka të bëjë me mënyrën se si mësojmë prej tyre dhe si ecim përpara së bashku.”
Pavarësisht rezultatit të fundit, forma e Xhakës mbetet një nga pikat më të forta të Sunderlandit, ndërsa pritshmëritë për sezonin e tij dhe të klubit vazhdojnë të rriten.
