Në një nga sulmet më agresive kundër Hezbollahut që nga armëpushimi i nëntorit 2024, Forcat Ajrore Izraelite (IDF) kryen një operacion të dielën që la të vdekur komandantin ushtarak të Hezbollahut, Ali Tabatabai, në zemër të Bejrutit. Katër militantë të tjerë u vranë gjithashtu gjatë sulmit, njoftoi grupi libanez terrorist.

Hezbollahu konfirmoi vdekjen e Tabatabait dhe paralajmëroi se “muxhahidët do të përparojnë me forcë dhe guxim për të përmbysur të gjitha projektet e armikut sionist dhe mbrojtësit të tij, Amerikës.” Ky sulm shënon një ndryshim të dukshëm taktike nga Izraeli, i cili gjatë vitit të kaluar kishte synuar kryesisht operativë të rangut më të ulët, duke shmangur komandantët kryesorë që vepronin më shumë në planin strategjik.

Zyrtarët izraelitë, përfshirë kryeministrin Benjamin Netanyahu dhe ministrin e Mbrojtjes, Izrael Katz, shpjeguan se vendosja e Tabatabait në shënjestër ishte e domosdoshme pasi masat më pak agresive nuk kishin frenuar procesin e riarmatosjes së Hezbollahut. Grupi libanez ende posedon dhjetëra mijëra raketa dhe mortaja, dhe një kundërsulm i mundshëm mund të çojë në bombardime të përditshme në veri të Izraelit, përfshirë Haifën.

Sulmi vjen pas një serie goditjesh të së shtunës ndaj bazave ushtarake dhe lançuesve të raketave të Hezbollahut në Libanin jugor. Tabatabai mori gradën e komandantit ushtarak të Hezbollahut në fund të vitit 2024, pas vdekjes së disa zyrtarëve të lartë, përfshirë Fuad Shukr dhe Ibrahim Aqil. Ndërsa Naim Qassem vazhdon të jetë udhëheqësi politik i grupit, Tabatabai konsiderohej truri ushtarak i organizatës.

Ky operacion rrit tensionet në rajon, dhe edhe pse Izraeli nuk ka planifikuar përshkallëzime të mëtejshme, vdekja e një komandanti ka të ngjarë të provokojë një reagim të Hezbollahut në ditët në vijim.