Ndërsa negociatat për t’i dhënë fund luftës në Ukrainë vazhdojnë, tensioni rritet pas deklaratave të ndryshme për qytetin e Pokrovskut. Moska pretendon se ka marrë kontrollin e Pokrovskut dhe Vovçanskut, ndërsa Kievi i mohon këto pretendime, duke i cilësuar si propagandë.

Zëdhënësi i Kremlinit, Dmitry Peskov, njoftoi se qyteti është nën kontroll rus, por Instituti për Studimin e Luftës (ISW) tha se nuk ka prova për një pushtim të plotë. Një zyrtar i lartë i NATO-s vlerëson se mbi 95% e Pokrovskut është nën kontrolle ruse, megjithëse njësi ukrainase vazhdojnë rezistencën. Ushtria ukrainase deklaron se situata mbetet nën kontroll dhe plani rus për të pushtuar qytetin ka dështuar gjatë muajit të fundit.

Video e publikuar nga Moska me flamurin rus në qytet është quajtur “shfaqje të inskenuar” nga ekspertët ukrainas. Luftimet më të ashpra zhvillohen në veri të Pokrovskut, ku prania ruse po rritet, por forcat e mjaftueshme këmbësorie ende mungojnë për të shtyrë plotësisht ushtrinë ukrainase. Fati i qytetit fqinj, Mirnograd, lidhet drejtpërdrejt me zhvillimet në Pokrovsk, ku avancimi rus rrezikon logjistikën dhe lëvizjet e trupave ukrainase.

Në Mirnograd, trupat ruse kanë arritur periferitë veriore e juglindore dhe bombardimet ndaj qendrës vazhdojnë. Ekspertët ukrainas paralajmërojnë se situata mbetet kritike dhe vetëm një “mrekulli” mund të ndryshojë rrjedhën e luftimeve në këtë zonë.