Kreu i Partisë Demokratike, Sali Berisha, duket i alarmuar nga aktiviteti i ish-deputetit Ervin Salianji, i cili ka nisur një tur takimesh me demokratët e bazës. Burime nga selia blu raportojnë se Berisha ka urdhëruar strukturat e partisë të sabotojnë çdo takim ose iniciativë të ish-deputetit, ndërsa është aktivizuar edhe një grup mediatik për të denigruar çdo veprim të Salianjit në mediat e kontrolluara dhe rrjetet sociale.

Deputeti demokrat Luan Baçi komentoi takimet e Salianjit:

“Demokratët janë të etur dhe duan që ne të zbresim në bazë, të fillojmë me takime. Takimet janë dashur gjithmonë të bëhen, por Partia Demokratike është një parti e organizuar me një statut… nuk mund të dal unë tani me të njohurit e mi dhe të bëj një takim në emër të PD-së. Patjetër që është takim jashtë strukturave të partisë.”

Ndërsa kreu i grupit parlamentar të PD-së, Gazment Bardhi, mbështeti qëndrimin e Berishës:

“Nuk ka lidhje intervista ime me ato që bën Salianji. Mbështes qëndrimin zyrtar të PD-së dhe të kryetarit Berisha, që ka thënë se çdo mbledhje jashtë forumeve është private.”

Nga ana tjetër, ish-deputeti Edmond Spaho kritikoi hapur Salianjin, duke e cilësuar si simbol të problemeve të brendshme të partisë. Ai shtoi se shumë demokratë u ndjenë të lehtësuar që u bë e qartë se Salianji kishte vepruar me hile ndaj Berishës dhe PD-së, por theksoi se problemi kryesor qëndron tek mungesa e moralit dhe politikat e gabuar të Berishës, që sipas tij favorizuan figura që sjellin përçarje. Spaho kujtoi edhe aferën “Babale”, për të cilën Salianji ka vuajtur një vit burg.

Zëdhënësi i Berishës, Alfred Lela, i kujtoi Salianjit se Berisha ka 500 mijë vota dhe sfidimi ndaj tij do të ishte i kot. Ai gjithashtu përmendi përpjekjet e Lulzim Bashës për ta sfiduar Berishën, të cilat sipas Lela-s, dështuan.