Në ceremoninë e 35-vjetorit të themelimit të Partisë Demokratike, Fiona Nishani, vajza e ish-Presidentit Bujar Nishani, foli për arritjet historike të kësaj force politike dhe rëndësinë e tyre për brezin e ri.

Ajo e cilësoi themelimin e PD-së më 11 dhjetor 1990 si një moment që “ndezi dritën e shpresës për Shqipërinë e lirë pas dekadash errësirë komuniste”. Nishani theksoi dy nga arritjet më të mëdha: liberalizimin e vizave drejt Evropës, që i hapi mundësi brezit të ri për studime dhe eksperienca ndërkombëtare, si dhe anëtarësimin e Shqipërisë në NATO, që siguroi një mbrojtje të qëndrueshme ushtarake dhe sigurie për vendin.

Në fjalën e saj, Nishani tha se brezi i ri është rritur duke përfituar nga këto arritje: “Ne jemi brezi që ka fluturuar drejt Evropës pa viza – një ëndërr që u bë realitet falë qeverisjes së Partisë Demokratike. Liberalizimi i vizave ishte çelësi që hapi dyert e mundësive, universiteteve, njohjeve dhe kulturave të reja.”

Ajo shtoi gjithashtu se anëtarësimi në NATO nuk ishte thjesht një firmë në dokumente, por garancia e një të ardhmeje më të sigurt: “Ne jemi brezi që është rritur i sigurt nën ombrellën e NATO-s. Anëtarësimi në NATO nuk ishte thjesht një firmë në një dokument; ishte garancia se e ardhmja jonë do të ishte më e sigurt sesa e kaluara e hidhur.”

Fiona Nishani përfundoi duke theksuar nevojën për energjinë dhe angazhimin e të rinjve: “Partia Demokratike ka më shumë nevojë se kurrë për ne, të rinjtë për energjinë, idetë dhe pastërtinë tonë morale. Ka nevojë për të rinj që nuk dorëzohen, që nuk e pranojnë padrejtësinë si normalitet, që nuk e pranojnë largimin si zgjidhje.”