Shtetet e Bashkuara kanë propozuar një zgjidhje të re për pjesë të rajonit lindor të Ukrainës që ende kontrollohen nga Kievi, duke sugjeruar krijimin e një “zone të lirë ekonomike” në ato territore, si pjesë e planit të paqes që po diskutohet mes palëve – bënë të ditur sot zyrtarë të përfshirë në bisedime.

Presidenti ukrainas, Volodymyr Zelensky, konfirmoi propozimin dhe tha se Rusia këtë zonë e quan një “zonë të demilitarizuar”.

“Kompromisi është që pala ruse të mos avancojë në këtë zonë,” deklaroi Zelensky gjatë një prononcimi në Kiev.

Megjithatë, presidenti ngriti dyshime serioze mbi mënyrën se si kjo zonë do të funksionojë në praktikë dhe si do të garantohet siguria.

“Nëse njëra palë tërhiqet, pse pala tjetër ndërluftuese nuk tërhiqet në të njëjtën distancë në drejtimin tjetër?” tha ai, duke theksuar se një tërheqje e pabarabartë do të krijonte rrezik për avancime të maskuara.

Zelensky theksoi se mbetet e paqartë edhe se kush do ta administrojë zonën e lirë ekonomike dhe si do të parandalohen skenarët ku Rusia mund të avanconte me trupa të veshur civilë.

Aktualisht, Ukraina kontrollon rreth 30% të rajoneve Donetsk dhe Luhansk, që përbëjnë Donbasin.

Zelensky konfirmoi gjithashtu se plani parashikon:
• Tërheqjen e ushtrisë ruse nga rajonet Sumy, Kharkiv dhe Dnipropetrovsk;
• Ngrirjen e vijës së frontit në rajonet jugore Zaporizhia dhe Kherson, bazuar në pozicionet aktuale.

Plani mbetet në diskutim dhe, sipas burimeve diplomatike, nuk ka ende një draft final të dakordësuar.
Ky propozim pritet të sjellë debate të forta në Ukrainë, mes atyre që kërkojnë një ndalesë të luftës dhe atyre që druhen se çdo kompromis mund të rrezikojë sovranitetin territorial të vendit.