Gazetarja Klodiana Lala ka zbuluar detaje nga mbledhja e sotme e Gjyqtarëve të Gjykatës Kushtetuese, e cila shqyrtoi kërkesën e kryeministrit për shfuqizimin e pezullimit nga detyra të zv/kryeministres Belinda Balluku.

E ftuar në emisionin “Kjo Javë”, Lala tha se brenda Kushtetueses ka pasur ndarje të thellë, me raport fillestar 4 me 4, dhe vetëm në minutën e fundit një prej gjyqtarëve ndryshoi votën, duke e çuar rezultatin në 5 pro dhe 3 kundër rikthimit të përkohshëm të Ballukut.

“Balluku rikthehet vetëm përkohësisht, deri më 22 janar”

Sipas Lalës, vendimi i sotëm nuk është fitore përfundimtare për kryeministrin:

“Kushtetuesja ka thënë qartë se Balluku rikthehet përkohësisht në detyrën që kishte, deri në 22 janar, kur do të zhvillohet seanca plenare publike. Nuk do të thotë patjetër që kryeministri e ka fituar betejën.”

Ajo shtoi se në seancën e janarit do të marrin pjesë përfaqësues ligjorë të të gjitha institucioneve, gjë që mund të ndryshojë dinamikën e çështjes.

Tension mes Ramës dhe gjyqësorit

Lala tha se vendimi është marrë në një klimë të fortë tensioni mes kryeministrit dhe GJKKO-së, duke kujtuar reagimin e menjëhershëm të Edi Ramës pas pezullimit të Ballukut nga posti:

“Sulmi frontal i kryeministrit ka cenuar pikërisht reformën në drejtësi, të cilën ai e ka konsideruar ‘kalin e betejës’ së tij. Duke mos zbatuar vendimet dhe duke ushtruar presion ndaj gjyqësorit, ai po minon vetë reformën që pretendon se ndërtoi.”

Megjithë rikthimin në detyrë, Lala nënvizon se masat ndaluese ndaj Ballukut, përfshirë ndalimin e daljes jashtë shtetit, mbeten ende në fuqi.

Çështja pritet të marrë një kthesë vendimtare në seancën plenare të 22 janarit, ku Gjykata Kushtetuese do të shprehet përfundimisht për pezullimin e saj.