Kryetari i Partisë Demokratike, Sali Berisha, vijoi akuzat e ashpra ndaj qeverisë dhe kryeministrit Edi Rama, duke deklaruar se vendimi i Gjykatës Kushtetuese për heqjen e pezullimit ndaj zv/kryeministres Belinda Balluku është “i diktuar nga Rama”.

Berisha u shpreh se Balluku “ka kapur për fyti kryeministrin” dhe se Rama ka ushtruar ndikim të drejtpërdrejtë mbi vendimin e Kushtetueses.

Në fjalën e tij, Berisha akuzoi:

“Sot i hoqi masën e pezullimit. Shkon nesër në zyrë si zv/kryeministre. E mori Ramën për fyti… Rama diktoi çdo gjë sot, diktoi gjykatën dhe hoqi masën e pezullimit.”

Lideri i opozitës deklaroi se demokratët do të nisin shumë shpejt protesta masive, ndërsa paralajmëroi se nesër mblidhet Kryesia e PD-së për të vendosur datën e nisjes së revoltave.

Ai shtoi se ka qindra qytetarë të gatshëm që t’i bashkohen nisjes së protestave:

“Ne do ngrihemi dhe nuk do rrimë deri në largimin e tij. 3000 shqiptarë janë gati që nesër. Do shtohemi. Nuk rrihet më. E liroi.”

Berisha akuzoi Ramën për kapjen e institucioneve dhe ndërhyrje në proceset e drejtësisë, duke thënë se zgjedhja e kreut të SPAK është e rrezikuar nga ndikimi politik:

“Për të zgjedhë kryetarin e SPAK, duhet të shkojë gjithë bota aty se e rrëmben Edi Rama. A ecet kështu? Kemi punë me Edi Ramën. O do votojmë të lirë ose do shuhemi.”

Në fund, ai theksoi se protestat nuk do të jenë simbolike, por të vazhdueshme:

“Vendosim për fillimin e revoltave që nuk ndalen më kurrë gjer në largimin e Edi Ramës. E filluam për të zënë vendin. Aty ditë e natë deri sa të rrëzojmë Edi Ramën. Është sheshi ynë, sheshi i fitores.”

Në vijim pritet vendimi zyrtar i Kryesisë së PD-së për datën e nisjes së protestave.