SpaceX po përgatitet të dalë në bursë vitin e ardhshëm dhe ka nisur një shitje dytësore të aksioneve që do të vlerësonte kompaninë në rreth 800 miliardë dollarë, sipas një letre të drejtuar aksionarëve nga drejtori financiar i kompanisë, Bret Johnsen.

Shitja dytësore do të përfshijë blerjen e aksioneve deri në 2.56 miliardë dollarë nga investitorët ekzistues dhe të rinj me çmimin 421 dollarë për aksion, duke synuar përgatitjen për një ofertë publike fillestare (IPO) të mundshme në vitin 2026.

Johnsen theksoi se IPO-ja mund të mbledhë një kapital të konsiderueshëm, nëse ekzekutohet me sukses dhe tregjet bashkëpunojnë. Kapitali do të përdoret për zgjerimin e programit Starship, për vendosjen e qendrave të të dhënave të inteligjencës artificiale në hapësirë, ndërtimin e Moonbase Alpha dhe për misionet me ekuipazh dhe pa ekuipazh në Mars.

Zgjerimi i shpejtë i Starlink, shërbimi satelitor i SpaceX, duke përfshirë planet për internet direkt në celular, si dhe progresi në programin e raketave Starship, janë faktorët kryesorë që nxitën vendimin për listimin publik.

Raportimet e fundit nga Bloomberg, The New York Times dhe Reuters tregojnë se SpaceX po planifikon të mbledhë mbi 25 miliardë dollarë përmes IPO-së, e cila mund të realizohet që në qershor 2026. Me këtë listim, kompania e Elon Musk do të bëhej një nga IPO-t më të mëdha globale, duke e renditur SpaceX në nivele vlerësimi mbi 1 trilion dollarë sipas disa estimimeve.

SpaceX vazhdon të jetë startup-i privat më i vlefshëm pas OpenAI, sipas të dhënave të Crunchbase, ndërsa bisedimet mbi planin e listimit po zhvillohen në një periudhë ringjalljeje të tregut të IPO-ve pas tre viteve thatësirë.