Perugia, Itali – Një i ri shqiptar, 23 vjeç, është arrestuar nga Karabinierët e Perugia-s nën akuzën e posedimit të lëndëve narkotike me qëllim trafikimi. Arrestimi ndodhi në zonën e Ponte Felcino, ndërsa i riu po drejtonte një Fiat 500 pranë një restoranti, ku dyshohet se kryente aktivitetin e tij të paligjshëm.

Gjatë kontrollit të automjetit, policia gjeti 30 pako kokainë të fshehura nën timon, me një peshë totale prej 33 gramësh, ku secila pako ishte rreth 0.8 gramë. Përveç drogës, u sekuestruan edhe 515 euro para të gatshme dhe një iPhone, raportojnë mediat italiane.

Arrestimi u konfirmua më pas nga një gjyqtar i Gjykatës së Perugia-s, i cili urdhëroi paraqitjen e 23-vjeçarit në polici për hetime të mëtejshme. Rasti ndjek hetimin e autoriteteve italiane për goditjen e trafikut të drogës në zonë.