Tiranë – Komisioni Qendror i Zgjedhjeve (KQZ) hodhi sot shortin për përcaktimin e qendrave të votimit që do t’i nënshtrohen verifikimit paszgjedhor për zgjedhjet e pjesshme për kryetar bashkie të datës 9 nëntor 2025.

Procesi i verifikimit paszgjedhor bëhet në përputhje me Kodin Zgjedhor, vetëm pasi të shpallet rezultati përfundimtar, të përfundojnë procedurat ankimore dhe zgjedhjet të jenë mbyllur.

Për këtë qëllim, 5% e qendrave të votimit në çdo KZAZ u përzgjodhën në mënyrë rastësore. Në zgjedhjet e 9 nëntorit 2025 u administruan gjithsej 472 kuti votimi, dhe duke qenë se nuk pati ankesa, shortit iu nënshtruan të gjitha QV-të. Nga shorti rezultoi që 24 qendra votimi do t’i nënshtrohen verifikimit paszgjedhor.

Ky proces ka për qëllim të sigurojë rregullsinë dhe saktësinë e administrimit zgjedhor, duke kontrolluar veprimtarinë e administratës dhe numërimin e fletëve të votimit.