Obiliq – Kryeshefi ekzekutiv i Korporatës Energjetike të Kosovës (KEK), Gramos Hashani, vizitoi sot kryetarin e Komunës së Obiliqit, Halil Thaçi, për t’i uruar suksese në detyrën e re dhe për të diskutuar mbi projektet e përbashkëta që synojnë përmirësimin e mirëqenies së qytetarëve.

Gjatë takimit, Hashani theksoi se KEK ndodhet në një fazë strategjike për rritjen e prodhimit dhe sigurinë e furnizimit me energji. Ai nënvizoi rëndësinë e modernizimit të termocentraleve, duke përmirësuar edhe komponentën ambientale dhe jetesën e banorëve të Obiliqit.

“Pas shumë dekadash, po fillojmë projekte që rrisin kapacitetet, sigurinë e furnizimit dhe modernizimin, duke ndikuar pozitivisht edhe në cilësinë e jetës së qytetarëve,” tha Hashani. Ai shtoi se KEK planifikon të dyfishojë buxhetin për projektet komunitare dhe përmendi parkun solar fotovoltaik mbi 100 megaëat, ku kompania gjermane ka ofruar mbështetje institucionale për lejet mjedisore dhe ndërtimore.

Kryetari Halil Thaçi falënderoi Hashanin për vizitën dhe shprehu gatishmërinë e komunës për të bashkëpunuar ngushtë me KEK-un në të gjitha projektet që përmirësojnë jetën e qytetarëve të Obiliqit.

Ky takim shënon një hap të rëndësishëm drejt thellimit të bashkëpunimit mes institucioneve lokale dhe KEK-ut, me fokus në projekte strategjike dhe zhvillim të qëndrueshëm për komunitetin.