Autoritetet italiane kanë arrestuar dy shoferë shqiptarë që udhëtonin me furgon nga Shqipëria drejt Italisë, pasi u kapën duke transportuar armë automatike dhe municione të fshehura në bagazhet e automjetit.

Operacioni u realizua në Monfalcone të Triestes, pranë pikës kufitare Sant’Andrea, nga Guardia di Finanza dhe Policia Ekonomike dhe Financiare (GICO). Furgoni, në të cilin udhëtonin gjithsej pesë shtetas shqiptarë, kishte hyrë në territorin italian përmes Sllovenisë, pas kalimit nga pika kufitare e Hanit të Hotit.

Gjatë kontrollit, dy shoferët shfaqën sjellje të dyshimta, gjë që i shtyu autoritetet të kontrollonin më detajisht automjetin dhe bagazhet. Në një valixhe me peshë të pazakontë u gjetën tre pushkë automatike “Kallashnikov” (AK-47). Kontrolli i mëtejshëm çoi në zbardhjen e dy armëve të tjera të të njëjtit lloj, si dhe pesë karikatorëve me gjithsej 356 fishekë.

Armët dhe municionet u sekuestruan, së bashku me telefonat celularë të dy shoferëve, të cilët u arrestuan në flagrancë për shkelje të ligjit italian mbi kontrollin e armëve (Ligji nr. 895/1967).