Përparim Billa, i njohur me nofkën “Rimi”, një shqiptar i arrestuar në vitin 2009 nga FBI-ja në SHBA si pjesë e operacionit “Shqiponja e Zezë”, është rikthyer në fokusin e drejtësisë, këtë herë në Ekuador.

Operacioni i FBI-së në Nju Xhersin zbuloi një rrjet kriminal me degë në shtatë vende, duke përfshirë Shqipërinë, Kosovën, Kanadanë dhe SHBA-të. “Rimi”, 38 vjeç në atë kohë, ishte përfshirë kryesisht në kontrabandën e cigareve, një aktivitet më pak spektakolar sesa trafiku i drogës apo armëve, por po aq fitimprurës për rrjetin. Ai u deklarua fajtor më 1 shtator 2009 dhe u dënua më 8 shkurt 2010 me një vit e një ditë burg, si dhe dy vite liri me kusht.

Pas përfundimit të dënimit në SHBA, Billa u transferua në Ekuador, ku regjistroi aktivitet tregtar me fruta, perime dhe zarzavate, si dhe hapi një lokal në Kuito. Sipas të dhënave, ai ka ruajtur lidhje me kompani në Emiratet e Bashkuara Arabe dhe ka menaxhuar importime në vitin 2020.

Në maj 2025, Billa u përfshi në hetime për krim të organizuar, pas arrestimit të Dritan Gjikës, kreut të mafies shqiptare në Ekuador, ndërsa më 26 nëntor 2025, u arrestua edhe Wilmer Chavarría, kreu i grupit të armatosur Los Lobos, një tjetër krah i mafies shqiptare.

Njësia e Hetimit kundër Krimit të Organizuar Transnacional e Prokurorisë së Përgjithshme të Ekuadorit ka kërkuar përfshirjen e Billës, së bashku me tre persona të tjerë, në një çështje për krim të organizuar me lidhje me mafien ballkanike. Seanca do të mbahet të enjten, më 18 dhjetor 2025.

Rikthimi i Përparim Billës në skenën kriminale ndërkombëtare tregon shtrirjen globale dhe fleksibilitetin e rrjeteve të krimit të organizuar shqiptar.