Ardon Jashari vijon të mbetet një enigmë në shtëpinë e Milanit, edhe pas rikthimit të tij në fushë. Mesfushori shqiptaro-zviceran nuk ka arritur të bindë as në paraqitjen e radhës si titullar, duke lënë ende shumë pikëpyetje mbi rolin dhe ndikimin real që mund të ketë në skuadrën kuqezi.

Në ndeshjen e zhvilluar dje në Riad, gjysmëfinale e Superkupës së Italisë ndaj Napolit, Jashari u hodh sërish nga minuta e parë nga Massimiliano Allegri. Trajneri i Milanit kishte zgjedhur të linte pushim Luka Modric, duke i besuar vendin në formacion një prej blerjeve më të shtrenjta të merkatos së verës, të dytin për nga kostoja pas Nkunku. Një zgjedhje që, megjithatë, nuk prodhoi efektin e dëshiruar.

Edhe pse Jashari nuk ishte ndër lojtarët më të dobët në fushë, ai humbi dukshëm duelin në distancë me Stanislav Lobotka, i cili dominoi mesfushën dhe i dha ritëm e kontroll lojës së Napolit. Aktivizimi i Modric erdhi vetëm në minutën e 75-të, në një moment kur fati i takimit ishte tashmë i vulosur dhe Milani kishte humbur kontrollin e ndeshjes.

Transferimi i Jasharit nga Club Brugge u finalizua pas një negociate të gjatë gjatë verës, për një shifër të konsiderueshme prej 34 milionë eurosh plus 3 milionë bonuse, në ditët e para të gushtit. Investimi i klubit ishte i qartë dhe pritshmëritë ishin të larta, por deri tani mesfushori nuk ka arritur të lërë gjurmë.

Edhe pse është rikthyer në dispozicion që në muajin nëntor, aventura e tij në Milano ka kaluar pothuajse pa u vënë re. Performancat e vakëta dhe mungesa e ndikimit në momentet kyçe kanë shtuar dyshimet, ndërsa koha dhe vazhdimësia mbeten faktorët kryesorë që mund të përcaktojnë nëse Ardon Jashari do të shndërrohet në një pikë force për Milanin apo do të mbetet një nga enigmat më të mëdha të këtij sezoni.