Teksa “Big Brother VIP Albania 5” po afron me premierën e madhe këtë të shtunë, më 20 dhjetor, pritshmëritë dhe kureshtja e publikut janë në rritje. Burime të shumta nga produksioni dhe mediat rozë kanë nisur të zbulojnë emra që pritet të trazojnë ujërat e shtëpisë më të famshme në vend.

Është konfirmuar tashmë se edhe këtë edicion, drejtimin e spektaklit do ta ketë sërish Ledion Liço, duke vijuar rolin e tij si moderator i formatit më të ndjekur televiziv në Shqipëri. Ndërkohë, përsa i përket panelit të opinionistëve, publiku duket i bindur se Arbër Hajdari do të rikthehet edhe këtë sezon.

Megjithatë, kuriozitetin më të madh për edicionin e pestë e ka marrë pikërisht emri i opinionistes femër, e cila ende nuk është konfirmuar zyrtarisht nga produksioni. Gjatë ditëve të fundit janë përfolur disa emra, por sipas burimeve të sigurta nga brenda produksionit, personazhi që po qarkullon më së shumti është Monika Kryemadhi.

Ky lajm është pritur pozitivisht nga një pjesë e publikut, i cili shpreson që përfshirja e saj të jetë e vërtetë, duke u bazuar në përvojën e gjatë publike, intelektin dhe karakterin e fortë që ajo përfaqëson. Deri në një konfirmim zyrtar, mbetet për t’u parë nëse Kryemadhi do të jetë surpriza e madhe e panelit të opinionistëve në “Big Brother VIP Albania 5”.