Pesë anëtarët e opozitës në Këshillin e Mandateve kanë denoncuar ashpër sjelljen e mazhorancës gjatë mbledhjes së së premtes, duke e cilësuar atë si një tentativë për të penguar drejtësinë dhe për të mbrojtur korrupsionin e zv/kryeministres Belinda Balluku.

Kreu i grupit parlamentar të PD, Gazment Bardhi, deklaroi në një konferencë për shtyp se opozita kërkon mbledhjen urgjente të Këshillit të Mandateve, për të shmangur rrezikun e prishjes së provave. Ai akuzoi kryetarin e Kuvendit se, sipas tij, me urdhër politik nga kryeministri Edi Rama, ka shtyrë mbledhjen pa caktuar afat, duke penguar shqyrtimin e kërkesës së SPAK për autorizimin e arrestimit të Ballukut.

“Ky është një akt politik i urdhëruar nga Rama për të penguar drejtësinë dhe për të mbrojtur korrupsionin e zv/kryeministres,” tha Bardhi, duke shtuar se opozita ka kërkuar dhe do të vazhdojë të kërkojë mbledhjen e Këshillit për miratimin e kërkesës së SPAK.

Opozita paralajmëron se qëndrimi i mazhorancës rrezikon hetimet duke lejuar prishjen e provave dhe intimidimin e dëshmitarëve, ndërsa situata mbetet e tensionuar në Kuvend për këtë çështje.