Autori dhe moderatori i emisionit ekonomik “Top Talk”, Angelo Haruni, është konfirmuar si banori i parë që do të hyjë në shtëpinë e “Big Brother VIP Albania 5”, i cili nis sonte në Top Channel në orën 21:15.

Haruni, i cili njoftoi pjesëmarrjen e tij përmes një postimi publik, shprehu gatishmërinë për të treguar veten pa filtra dhe pa formalitete. “Sot po e mbyll këtë kapitull me shumë mirënjohje, sepse nesër hapet një tjetër. Nga nesër, zyrtarisht, do të jem konkurrent në Big Brother VIP Albania 5. Sipas rregullave, menjëherë pas këtij momenti do të hyj në izolim total. Pa telefon, pa kontakt, ashtu siç tashmë ndodhen edhe konkurrentët e tjerë,” tha ai.

Moderatori theksoi se pjesëmarrja në “BBV” nuk është për të interpretuar një rol, por për të treguar versionin e tij të vërtetë: “Në Big Brother nuk shkon një rol, një plan, shkon njeriu. Dhe ajo që do të shihni nuk është versioni i moderuar, por versioni i vërtetë: me gabime, emocione, forcë dhe dobësi.”

Haruni shprehu shpresën që mbështetja e publikut do ta shoqërojë gjatë këtij udhëtimi, me synimin për të shkuar deri në fund të garës: “Faleminderit për gjithçka. Tani… shihemi brenda shtëpisë.”