Një konflikt i çastit i regjistruar pasditen e sotme në zonën e Plazhit në Durrës ka përfunduar me plagosjen e një taksisti.

Ngjarja ka ndodhur rreth orës 17:35, në lagjen nr. 13, në sektorin e njohur si “Hekurudha”, ku gjatë një përplasjeje për motive ende të paqarta, një 45-vjeçar dyshohet se është goditur me armë të ftohtë nga persona ende të paidentifikuar.

I plagosuri, Florant Sinanaj, banues në Tiranë, është transportuar me urgjencë në Spitalin Rajonal të Durrësit. Burime spitalore bëjnë me dije se ai ka pësuar dy plagë shpuese në gjoks dhe në bark dhe i është nënshtruar një ndërhyrjeje kirurgjikale. Fatmirësisht, ndodhet jashtë rrezikut për jetën dhe nën kujdesin e mjekëve.

Policia ka mbërritur menjëherë në vendngjarje dhe ka nisur hetimet për zbardhjen e plotë të rrethanave të konfliktit. Grupi hetimor po punon për identifikimin dhe kapjen e autorit apo autorëve të dyshuar, ndërsa po merren dëshmi dhe po analizohen pamjet e mundshme të kamerave të sigurisë në zonë.