Në prag të Krishtlindjeve, festës që simbolizon bashkimin familjar, Brooklyn Beckham ka ndërmarrë një veprim drastik duke ndërprerë të gjitha lidhjet dixhitale me prindërit e tij, David dhe Victoria Beckham, si dhe me vëllezërit e motrat Romeo, Cruz dhe Harper.

Sipas mediave amerikane, marrëdhënia mes djalit të madh të familjes Beckham dhe pjesës tjetër të familjes ka qenë e tensionuar prej kohësh, por situata duket se është përshkallëzuar ndjeshëm pikërisht para festave të fundvitit.

Burime të cituara nga US Sun bëjnë me dije se shkak i konfliktit të fundit ka qenë një veprim i thjeshtë në rrjetet sociale: një “pëlqim” i Victoria Beckham në një postim të Brooklyn. Ky reagim i saj ka sjellë një valë komentesh nga ndjekësit, të cilët i bënin thirrje Brooklyn-it të pajtohej me familjen.

Ky presion publik thuhet se e ka irrituar Brooklyn Beckham, i cili fillimisht ka bllokuar nënën e tij në rrjetet sociale. Brenda pak orësh, veprimi është shtrirë edhe ndaj David Beckham dhe tre fëmijëve të tjerë të familjes.

Sipas burimeve pranë çiftit Beckham, David dhe Victoria janë “të zemëruar dhe të lënduar”, veçanërisht për faktin se kjo ndodhi pak para mbledhjeve familjare të Krishtlindjeve. Ndërkohë, Cruz Beckham është detyruar të reagojë publikisht për të mohuar zërat se prindërit kishin hequr dorë nga ndjekja e Brooklyn-it në rrjetet sociale.

Edhe pse Brooklyn ka deklaruar se dëshiron që çështjet familjare të zgjidhen privatisht, veprimet e fundit sugjerojnë se përplasja mes tij dhe familjes Beckham është ende larg përfundimit.