Ish-mesfushori i Kombëtares shqiptare, Odise Roshi, ka rënë pre e hackerave në rrjetet sociale, duke shpërndarë mesazhe të padëshiruara nga profili i tij në Instagram. Lajmin e bëri të ditur vetë futbollisti, i cili kërkoi ndjesë ndaj ndjekësve të tij për shqetësimin e shkaktuar.
Në një njoftim në Instagram, Roshi deklaroi: “Gjatë 15 orëve të fundit, Instagrami im ka qenë i ‘hacker-uar’. Më falni për të gjitha mesazhet ‘spam’. Mos hapni asnjë link që vjen nga profili im, për sigurinë tuaj. Faleminderit! O.R”.
Futbollisti shqiptar, aktualisht 34 vjeç, aktivizohet në Ligën e Parë turke te ekipi Ankara Keciorengucu, ku këtë sezon ka shënuar katër gola dhe ka dhuruar dy asistime në 19 paraqitje në të gjitha garat. Ai konfirmoi se tashmë ka rikuperuar kontrollin mbi llogarinë e tij dhe profili është i sigurt.
