Prishtinë – Në mesha solemne të Krishtlindjes në Katedralen “Shën Nënë Tereza”, Ipeshkvi i Dioqezës Prizren-Prishtinë, Dodë Gjergji, përçoi mesazhin e paqes, përgjegjësisë qytetare dhe harmonisë shoqërore, duke lidhur rëndësinë e festës me nevojën për stabilitet politik dhe avancim drejt Bashkimit Evropian.

Gjatë homelisë, ai theksoi se bota përballet sot me urrejtje, padrejtësi dhe pasiguri, duke theksuar se “shkatërrimi i shpresave të brezave të rinj bën të domosdoshme një reflektim të përgjegjshëm për të restauruar gjendjen e shoqërisë sonë”. Gjergji ftoi qytetarët të kontribuojnë në stabilitetin e vendit dhe ruajtjen e vlerave bazike të komunitetit.

Mesha e Krishtlindjes, e kremtuar në ditën e sotme, përkujton lindjen e Krishtit dhe rëndësinë e saj shpirtërore, duke u shoqëruar me traditat e pemës së Krishtlindjes, shkëmbimit të dhuratave dhe bashkimit familjar.

Ceremonitë vazhdojnë gjatë ditës: nga ora 11:00 në Katedralen “Shën Nënë Tereza” dhe nga ora 18:00 në Kishën e “Shën Ndout” në Ulpianë, Prishtinë.