Drejtori i Përgjithshëm i Agjencisë Kombëtare të Ujësjellës-Kanalizimeve, Flauers Shoshi, së bashku me kreun e Ujësjellësit të Vlorës, Ermal Murati, inspektuan sot nga afër dëmtimin e rëndë në tubacionin kryesor me diametër 1000 mm.

Gjatë pasdites, ekipet realizuan një zgjidhje provizore për furnizimin me ujë të qytetit, e cila nuk është përfundimtare. Për shkak të defektit serioz, ndërhyrja do të vijojë nesër në mëngjes, me qëllim riparimin e plotë të tubacionit dhe rikthimin e furnizimit normal.

“Avaria është vërtet serioze. Për çështje sigurie u detyruam të ndërpresim furnizimin me ujë, pasi presioni ishte shumë i lartë. Nesër do të kemi një ndërhyrje më të plotë për të zgjidhur një herë e mirë problemin që ndodh shpesh në tubacionin 1000 mm,” tha Murati.

Shoshi shtoi se ekipet po punojnë me intensitet maksimal për rikthimin e shërbimit normal dhe theksoi vështirësinë teknike të ndërhyrjes. Një grup i gjerë specialistësh nga ANUK dhe Ujësjellës Kanalizime Rajoni Vlorë është angazhuar për zgjidhjen e situatës.

Autoritetet kërkuan mirëkuptimin e qytetarëve dhe u angazhuan për rikthimin sa më të shpejtë të furnizimit me ujë.