Kreu i Partisë Demokratike, Sali Berisha, ka folur sot në një intervistë televizive për politikën, sfidat e fundit dhe shpalljen e tij non grata nga SHBA-të, të cilën e përshkroi si “një rrufe në qiell të hapur”.
Berisha theksoi se gjatë kohës së tij në drejtim të PD-së ka ardhur me një program që, sipas tij, ka ndryshuar Shqipërinë dhe ka vazhduar me reformat e nisura. “Ata që erdhën me rebelim i përzura me votën e lirë. Erdha me një program që ndryshova Shqipërinë. U ndjeva i përkushtuar. Do vazhdoja reformën,” u shpreh ai.
Ai shtoi se demokratët kanë arritur të mbajnë kauzën e tyre dhe shprehu besimin se do të rikthehen në pushtet. Berisha foli edhe për momentet pas shpalljes non grata: “Ishte një rrufe në qiell të hapur. Vendimi ishte për korrupsion dhe minim të demokracisë. Ishte një fyerje e rëndë për dinjitetin tim. Por ia dolëm dhe do ia dalim. Është kauzë e drejtë.”
Berisha kujtoi gjithashtu përvojat e tij personale dhe reflektimet mbi kohën e gjatë në pushtet, duke shtuar se morali dhe empatia janë të domosdoshme për sukses në politikë: “Jashtë moralit dhe empatisë e kam të vështirë të mendoj. Mund të kesh sukses, por do jesh problem i madh.”
Intervista u fokusua edhe tek sfidat e brendshme në PD, roli i burokratëve ndërkombëtarë dhe përpjekjet për të mbrojtur integritetin e partisë dhe të opozitës shqiptare.
