Gruaja e ish-Presidentit të Koresë së Jugut, Yoon Seok-gyeol, është arrestuar në muajin gusht dhe përballet me një sërë akuzash të rënda penale, përfshirë manipulimin e tregut të aksioneve, korrupsionin pasiv dhe shkelje të ligjit zgjedhor, duke thelluar krizën politike që ka përfshirë vendin.

Në një deklaratë zyrtare pas përfundimit të një hetimi gjashtëmujor, prokurori Min Joong-gi deklaroi se institucionet shtetërore të Koresë së Jugut ishin “tronditur seriozisht nga abuzimet me pushtetin e znj. Kim”. Sipas Prokurorisë, ish-zonja e parë, e cila mbajti këtë rol nga viti 2022 deri në 2025, “ndërhyri në mënyrë të paligjshme në punët e shtetit në korridore, larg syrit të publikut”.

Një tjetër prokuror, Kim Hyeong-gyun, theksoi se ndikimi i saj ishte ushtruar në mënyrë të vazhdueshme dhe të fshehtë, duke cenuar funksionimin normal të institucioneve demokratike.

Prokuroria e akuzon ish-zonjën e parë se ka përfituar ryshfete në vlerën totale prej 377.25 milionë won (rreth 223 mijë euro) nga biznesmenë dhe politikanë. Sipas dosjes hetimore, ajo dyshohet gjithashtu se ka marrë dhurata luksoze, përfshirë dy çanta Chanel dhe një gjerdan të markës Graff, nga Ha Hak-ja, drejtuesja e Kishës së Unifikimit, e njohur ndryshe si “sekti i Hënës”.

Në listën e dhuratave të dyshuara përfshihen edhe një pikturë nga artisti i njohur minimalist Lee Woo-fan, një çantë Dior dhe një orë dore bizhuteri. Ish-zonja e parë ka mohuar se kishte dijeni për këto transaksione, kur u mor në pyetje nga prokurorët.

Në fillim të dhjetorit, Prokuroria kërkoi dënimin e saj me 15 vite burg dhe një gjobë prej dy miliardë wonësh (rreth 1.4 milionë dollarë), duke argumentuar se ajo veproi sikur të ishte “mbi ligjin” dhe “bashkëpunoi me një organizatë fetare, duke vënë në pikëpyetje ndarjen e fesë nga shteti, siç parashikohet në Kushtetutë”.

Nga ana e saj, Kim i ka mohuar të gjitha akuzat, të cilat i ka cilësuar si “thellësisht të padrejta”.

Skandali vjen në një moment tejet delikat për Korenë e Jugut, pas shpalljes së gjendjes së jashtëzakonshme nga ish-Presidenti Yoon Seok-gyeol në dhjetor të vitit 2024, një masë që zgjati vetëm disa orë, por që e zhyt vendin në një krizë të thellë politike. Yoon u shkarkua nga detyra këtë vit pasi u shpall fajtor për kryengritje, një akuzë që ai e ka mohuar vazhdimisht.

Sipas autoriteteve, kjo është hera e parë në historinë e Koresë së Jugut që një ish-president dhe bashkëshortja e tij arrestohen të dy për akuza të ndara penale. Gjykata pritet të japë vendimin përfundimtar në rastin e znj. Kim më 28 janar.