Dy aksidente rrugore janë regjistruar në Rrugën e Kombit, si pasojë e kushteve të vështira atmosferike dhe pranisë së akullit në segmentet e rrugës.

Sipas informacioneve paraprake, një ambulancë është përmbysur gjatë lëvizjes, ndërsa dyshohet se drejtuesi ka humbur kontrollin e mjetit për shkak të akullit që ka mbuluar asfaltin.

Po në të njëjtën zonë ka ndodhur edhe një aksident zinxhir, ku disa automjete janë përplasur me njëra-tjetrën, gjithashtu si pasojë e rrugës së rrëshqitshme.

Fatmirësisht, deri në këto momente nuk raportohet për viktima, ndërsa autoritetet ndodhen në vendngjarje për të menaxhuar situatën dhe për të normalizuar qarkullimin. Policia u bën thirrje drejtuesve të mjeteve të tregojnë kujdes maksimal dhe të përshtatin shpejtësinë me kushtet e rrugës.