Kryetari i Partisë Demokratike, Sali Berisha, komentoi ashpër arrestimin e presidentit venezuelas Nicolás Maduro, duke e cilësuar si një moment historik dhe një fitore për sundimin e ligjit ndërkombëtar.

Në foltoren përpara Kryeministrisë, Berisha e krahasoi vitin 2026 me periudhën e rrëzimit të diktaturave komuniste dhe theksoi se sot format më të përhapura të autoritarizmit janë “narko-diktaturat dhe autokracitë elektorale”. “Sot, falë Zotit, ushtria amerikane dhe qeveria e Shteteve të Bashkuara, në një nga operacionet më të përsosura në histori, arrestuan dhe nxorën para gjyqit Ramaduron e Venezuelës, apo Maduron e Venezuelës”, tha ai.

Berisha kritikoi mediat shqiptare, të cilat sipas tij po e paraqesin arrestimin si shkelje të sovranitetit, duke argumentuar se dhunuesit më të mëdhenj të ligjit dhe sovranitetit janë diktatorët dhe regjimet autoritare. Ai shtoi se nuk mund të ketë sovranitet të vërtetë aty ku zgjedhjet shndërrohen në farsë elektorale dhe se çdo narko-diktator që manipulon zgjedhjet nuk meriton të qëndrojë në pushtet.