Policia e Korçës ka nisur procedim penal në gjendje të lirë ndaj 70-vjeçarit Nevzat Çeço, banues në fshatin Kolanec të Maliqit, pas deklaratave kërcënuese të bëra publikisht ndaj tre autorëve të dyshuar të vrasjes së të birit, Martin Çeço, ngjarje e ndodhur tre vite më parë.

Sipas njoftimit zyrtar, hetimi u nis pasi i moshuari reagoi një ditë pas vendimit të Gjykatës së Apelit Tiranë, e cila ndryshoi masën e sigurisë për tre të dyshuarit nga “arrest në burg” në “arrest në shtëpi”. Në një video të shpërndarë në rrjetet sociale, ai shprehu kërcënime të rënda dhe deklaroi se nuk mund të pranonte lirimin e tyre.

“Shërbimet e Komisariatit të Policisë Maliq referuan materialet në Prokurori, ku filloi procedimi penal për shtetasin N. Ç., 70 vjeç, për veprën penale ‘kanosja serioze për hakmarrje ose për gjakmarrje’,” bëri me dije Policia.

Autoritetet sqarojnë se deklaratat u bënë në kontekstin e vendimit gjyqësor për ndryshimin e masës së sigurisë ndaj tre personave të dyshuar për vrasjen e të riut, trupi i të cilit u gjet i hedhur në një rezervuar pas një konflikti në qershor të vitit 2022.

Materialet procedurale i janë referuar Prokurorisë për veprime të mëtejshme, ndërsa rasti vijon të trajtohet nga organet e drejtësisë.