Pio Esposito po kthehet gjithnjë e më shumë në një nga protagonistët e Interit në këtë sezon, duke firmosur gola vendimtarë që po peshojnë drejtpërdrejt në rezultatet e skuadrës. I fundit ishte ai kundër Lecces, që i dha fitoren zikaltërve dhe konfirmoi momentin pozitiv të 20-vjeçarit.
Viti 2026 pritet të jetë ai i konfirmimit përfundimtar për sulmuesin italian, i cili synon të luftojë për titullin kampion me Interin dhe njëkohësisht të sigurojë kualifikimin në Botërorin e këtij viti me kombëtaren.
Paraqitjet e Espositos nuk kanë kaluar pa u vënë re, veçanërisht në Premier League, ku disa klube angleze thuhet se kanë shfaqur interes konkret për talentin zikaltër. Pikërisht për të shmangur çdo surprizë nga Anglia, drejtuesit e Interit, Beppe Marotta dhe Piero Ausilio, kanë vendosur të lëvizin në kohë.
Sipas burimeve pranë klubit, Interi ka planifikuar të nisë bisedimet për rinovimin e kontratës me përfaqësuesit e futbollistit gjatë pranverës. Ideja është e qartë: një marrëveshje e re deri në vitin 2031, që do të shoqërohet me një rritje të ndjeshme të pagës.
Espositos pritet t’i ofrohet një kontratë me pagë bazë prej 2.5 milionë eurosh në sezon, plus bonuse, nga 1.1 milionë euro që përfiton aktualisht. Nëse rendimenti i tij vijon të rritet, paga mund të shkojë deri në 3 milionë euro në vit.
Interi synon kështu të blindojë një nga asetet më të çmuara të së ardhmes, duke i dhënë besim total një talenti që po rritet ndeshje pas ndeshjeje.
